آزربايجان و آنادولوافسانه‌لري
آزربايجان و آنادولو افسانه‌لري
يونانجا ميتهوس سؤز حيكايه معناسينا گلن افسانه‌لر تانري لارين ، قهرمان لارين كايناتين ، ميئدانا گلمه سينين حيكايه‌لري (1) شكلينده تقديم ائديله‌ره‌ك اساساً آچيكلاييجي بير خاراكتر داشي‌يير و تانري‌لارين هاردان گلدييي ،كايناتين نئجه ياراديلديغي ، كايناتداكي طبيعي حاديثه‌لرين نئجه مئيدانا گلدييي ، اينسانين هارادان يولا چيخديغي ،اينسان و دونيانين گله‌جه‌يي نئجه اولاجاق سؤاللارين جوابي كيمي قاريشميزا چيخير .
افسانه‌لر تانري لارين كوْسموْسون ،اينسانين ياراديليشلاري ايله بيرليكده ايلك گوناهي ، ايلك اؤلومو تانري لارين اينسانلاري نئجه جزالانديرديقلاريني ، ايكينجي پلاندا ايسه اوْوچولوغون،اكينچيليين نئجه باشلاديغي ايلك دفعه اودون اينسان معيشتينه نه زامان داخيل اولدوغونو آنلادير .
افسانه‌لر ايبتيدائي جمعيت‌لردن گونوموزه توپلومون عادت ، عنعنه و داورانيش‌لاريندان تاثيرلي اولموشدور . ميثال اوچون ايبتيدايي جمعيت‌لرده توپلومون بيلگي‌لنديريلمه‌سينده افسانه‌لرين اؤنملي بير يئره صاحيب اولدوغونو گؤروروك و اوغلان اوشاقلارين توپلومون حقيقي عوضولري كيمي يئتيشمه‌سينده قبيله افسانه‌لرينين اويناديغي رول‌اينكار اولونمازدير . (2) افسانه بير چوخ توپلوملاردا سؤيله‌ييش واسيطه‌سيدير و دييشيك آدلاردا قارشيميزا چيخماقدادير . افسانه سؤزوجويو بيزيم ديليميزه فارسجادان كئچميشتير.
( فسانه ، افسانه ) آزربايجاندا اساطير ، ميف ، افسانه عربجه‌ده ، اوسطوره اولاراق آدلانديريلير . لاتينجه ، لئگئندوس سؤزجويوندن قايناق لاناراق ، اينگليسجه ده ، لئگئند ، فرانسيزجادا ، لئگئندا، آلمانجادا لئگئندا و ساقه ، ايتاليانجادا لئگگئندا ، ايسپانجادا لئيئندا و روس‌جادا لئگئندا كيمي آدلانديريلير . (3)
آنادولو ادبياتيندا اولدوغوكيمي آذربايجان ادبياتيندا دا افسانه ، تاريخي حاديثه‌لردن ،شخصيت‌لردن سؤز آچان جانلي و بللي بير شكلي اولان حئكايه‌لردير . بو حئكايه‌لرين يارانماسي چوخ اسكي زامان لاردا باش وئرميشدير . ايبتيدائي اينسانلار ، تاريخي حاديثه لري حئكايه بيچيمينده بير بيرلرينه چاتديريرديلار بوحئكايه لر گئديكجه افسانه‌يه چئوريله‌ره‌ك نسيلدن نسيله اؤلكه‌دن اؤلكه‌يه ككئچه‌ره‌ك ياييليردي (4) ابدي ايصطلاح اولاراق افسانه بعضاً ميف ، رئوايت ناغيل اولاراق وئريلميشديرده افسانه‌آدي ايله يازي‌يا آلينميشدير . شيفاهي خالق ادبياتينين خوصوصي بير نؤوع اولاراق افسانه‌نين بديعي شكلي كوْمپوْزيسياسي اوسلوب و ايفاده طرزي اعتباري ايله آيري بير خوصوصيتي واردير . (5)
قيساليغي و نثيرله سؤيلنمه‌سي نتيجه سينده افسانه‌ني چوخ زامان ناغيل لا قاريشيق ساليرلار . آمما افسانه‌ني ناغيل دان آييرماغا يارايان بير اؤزونه مخصوص‌لوغودا اونون‌سوْنونون ناغيل دان فرقلي بيتمه سيدير . بيليندييي كيمي ناغيل هر زامان سوْنو خئيره باغلايان بير آنلاتيم نؤوعودور . (6) عيني شكيلده افسانه‌نين بللي مرحله‌لردن كئچه‌رك يارانديغي دا بيلينمك ده دير .
بير داستان پارچاسي ، موركب و اوزون نفسلي سؤيله‌شي بوتونون‌دن قوپوپ اؤزونه مخصوص بيچيم ماهيت‌لريني ،صنعت سوسله‌مه‌لريني ايتيرينجه ، يالنيزجا غيري عادي يؤنلريله بير آدامي و يا بير حاديثه‌ني بيلديرمه وظيفه‌سي ايله كيفايت‌له‌نينجه افسانه اولور ( 7)
افسانه‌لر خالقين چاره‌سيزليك‌لريني اوميدلريني، دونيا گؤروش‌لريني داها آيدين بير شكيلده بيلديري چؤنكو افسانه‌نين اساسيني داها چوخ اينانيش موْتيولري تشكيل ائدير. ( 8 )
بونا گوره‌دير كي افسانه‌لر خالقا تاثير گؤسته‌رير . داورانيشلارينا يؤن وئرير.
جمعيت ، اؤز اؤزونو داوام ائتديرن ، بللي بير فيزيكي يئري اولان وارليغيني اوزون زامان سوردورن و بير حيات طرزيني پايلاشان اينسان توپلوغودور( 9 ) بو حيات طرزي سوردورولمه مرحله سينده‌يئني‌نسيل لره منيمسه‌ديلير . افسانه‌لرين اينسان ياشاميندا اؤنملي بير رولو واردير و اويناديقلاري بو رول اينسان لارين داورانيشلارينا يؤن وئرمه ايستيقامتينده اولدوكجا لازيملي‌ديرلار ، بونون سببي‌ده ايناملا باغلي اولمالاري‌دير .
افسانه‌لردن خالق حياتي ايله ياناشي غير عادي عونصورلرده واردير . آنجاق بوغيرعادي‌ليك‌لره باخماياراق هم‌آنلادان‌لار ، همده دينله‌ييجي ، اونون‌گرچك اولدوغونا اينانير .
هر افسانه ده خالقين حقيقي ، شعور و ذؤوق لري اونون گله‌جه‌يه اولان اينانج و آرزولاري عكس اولونموش‌تور (10) آزربايجان افسانه لرينده ده جمعيتين حوقوقي ده‌يرلري عادت عنعنه‌لري و اينانج‌لاري ياشاييلماقدادير . جمعيتين قبول ائتدييي اينسان شكيلينين اورتايا چيخاريلماسي باخيميندان افسانه‌لر اؤنملي بير يئره صاحيب دير . اينسان اوغلو اينانديغي شئي منيمسه‌يير منيمسه ديك لرينه ده‌ير وئرير و بومنيمسه‌ديكلريني ياشاتماق ايسته‌يير . ياشاتماق ايسته‌ديكلري خوصوصيت‌لرين چوخونو افسانه‌لرينده عكس ائتديرير.
دئيه‌بيله‌ريك‌كي جمعيتين آيناسي ماهيتيني داشي‌يان افسانه‌لر . فردلرين ، ايجتيماعي لشمه سينده مدني‌لشمه‌سينده ، او مدنيتين بير عوضوو وضعيتينه گتيريلمه سينده ، چوخ اؤنملي رول اويناميش دير .
فسانه‌لرده چئشيتلي دؤورلرين ايلك تصوَرلريندن اعتيباراً تاريخيميز ، مدنيتيميز ،خالقين طالعي ايله باغلي بير چوخ اؤنملي مرحله‌نين آيدينلاديلماسي اوچون لازيملي زنگين ائستئتيك ماتئرياللار واردير . (11) . افسانه‌لر بو اؤزونه مخصوص لوغو ايله تاريخه ايشيق سالار اينسانلارا ائستئتيك ذؤوق له بيرليك‌ته تاريخ بيلگيسي ده وئرير. افسانه آذربايجان آنادولو فولكلور لا علاقه‌لي اولسالار دا ، اونلاردا خالق دوشونجه سي ،خالق فانتازياسي اوستون‌لوك تشكيل ائدير . (12)
بومقاله‌ده اله الينان افسانه‌لرين سؤي‌لنديك‌لري چئوره‌لرده‌كي اينسان لارين عادت ، عنعنه ، اينانچ و كولتورلريني مئيدانا گتيرن عونصورلرين ياشاملارينا تاثير لري و افسانه‌لرين ايچلرينه سينديريلميش بيليك لرين خوصوصيت‌لريني نؤوع اولاراق آشاغيداكي كيمي سيرالايا بيله‌ريك . پيسخولوژي ، سوسيولوژي ، ائتيك ، ائكونوميك .
ايندي ايسه اورنك وئرديميز ميثال لارلا فيكيريميزي ايضاح ائتمه‌يه چاليشا جاغيق
مارال گول
گنجه خاني هر ايلين باهار آيلاريندا كه‌پز داغينا يايلاماغا چيخاردي . خانين اوردا خوصوصي بير يئري واردي . خان خزينه‌سيني ده بو يوردون آلتيندا باسديرميشدي . بو ايلين پاييزي ائله گؤزل كئچيركي هرياني باهار آيلارينداكي كيمي اوت باسير .يورت يئرلري ايتير . خان بيرده يايلاغا چيخاندا اوْت باسميش يورت يئريني تاپا بيلمير . بو حاديثه‌دن كيمسه خبرتوتماسين دئيه خان باشقا بير مكاندا يئر سئچيب چاديريني قورور . ياواش ياواش گيزلي گيزلي كؤهنه يورد يئريني آختارماغا باشلايير . آمما يئنه ده تاپا بيلمير.
خانين گنج بير چوباني واردي . بو چوبان گيزلي گيزلي خانين قيزي مارالا كؤنول وئرميش‌دي . بونو قيزين اؤزوده دويموش دو . آمما هر ايكيسي ده بيلميردي كي بو اولاجاق ايش دئييل. چوبان نئي چالاردي . دره لره ، سس سالاردي . خان بير گون چوبانين نئي سسينه قولاق وئره‌ركن حيس ائدير كي اونون چوباني »خان قيزيني منه وئرسن يورد يئرينين هاردا اولدوغونو سنه سؤيله‌رم« چالير.
خان آروادينا دئيير: ائشيديرسن مي ؟ او يورد يئريميزي بيلير ، اونو آلداديب بو سيّري اؤيره‌نمه ليييك . خانين آروادي جاوابيندا : او قيزيميز مارالي سئوير اونو آنجاق قيزي وئره‌جه‌ييميز وعده ايله يولا گتيرمك اولار .
خان حيرصيندن دوداغيني يئسه‌ده » اولسون دئدي : آخشام عاييله ده بو حاديثه ايله باغلي صوحبت اولدو . مارال دئدي : منيم ده اؤز شرطيم وار . كه‌پز داغينين قوينوندا گؤزل بير گؤل قورويور، من اوْ اوْغلانا اره گئديرم كي او داغدان قورويان گؤله سو چكديرسين . چوبان بو شرطي قبول ائتدي . دومانلي بير گونده يئريني ياخشي بيلدييي . خانين ايتميش خزينه سيندن بير آز قيزيل گؤتوروب اوستالارا داغدان قورويان گؤله سوْچكتيرمه‌يه باشلادي . آخيردا بولاق سويو قورويان گؤله آخماغا باشلادي . بو هر كسي سئوينديردي . ائشيديب بيلن خان قيزي مارالا احسن دئدي .
اوزاماندان دا بولاق » خان قيزي بولاغي ، گؤل ده مارال گؤل « آدلانديريلدي .
بو افسانه‌نين نتيجه‌سي:
پول بير آرزونو حياتا كئچيريلمه‌سينده گوجلو بير واسيطه‌دير . چوبان خزينه‌دن آلديغي قيزيلي اوستالارا وئريب بولاغين سويونو قورويان گؤله چكديردي . وئريلن سؤز توتولمالي دير .
خان قيزي بولاغين سويونو گؤله چكديرن چوبان‌لا عيني صينيفدن اوْلماسالاردا ائولنمك سؤزونو يئرينه يئترميشدير . باشقالارينين ماليندان ، صاحبيندن خبرسيز ايستيفاده ائديلمه‌مه‌ليدير. چوبان خانين خبري اولمادان اونون خزينه‌سيندن ايستيفاده ائدير .
موسيقي‌اينسانلارين دويغولاري باخيميندان اؤنملي دير چوبان نئي چالاراق دويغولاريني آنلاتميشدير . شانس زامانيندا ده‌يرلنديريلمه‌لي‌دير چوبانين ، خانين يئريني يوردونو بيلمه‌سي ، و بونو واختيندا قيمت‌لنديرمه‌سي اونو خانين قيزينا قووشدورور .
يالنيز صبيرلي ، قرارلي اينسانلار مقصد‌لرينه چاتيرلار . چوبانين بولاغين سويونو گؤله چكمه‌سي اوچون صبر و زحمت گرك‌دير . اينسانلارا مادي وضعيت‌لرينه گؤره قيمت وئرمك دوغرو دئييل .
قيزين آتاسينين ، قيزين چوبان ايله ائولنمه‌سينه قارشي چيخماسي.
هر شئيين بير ده يري وار . گؤزه‌له صاحيب اولماق آسان ايش دئييل . چوبان قورويان گؤله سو چكديره بيلسه خان قيزي اونون اولاجاق دير . شانتاژ پيس بير شئي‌دير . بير كيمسه‌ني شانتاژ ائتمك دوغرو دئييل . چوبان خانين يورد يئريني قيزيني آلماق اوچون سؤيله‌مير.
اوچ قيزقالاسي
اوچ قيزلار قاياسي ، هافيك قصبه‌سينين توْزانلي بؤلگه سينده كي اكين گؤلو كندينده يئرلشير.
عثمانلي دؤنه‌مينده‌كي داخيلي عوصيان لار نتيجه سينده داغلار قاچاقلار لا دولموشدو .
بو قاچاقلارين بير حيصه‌سي خالقا ياخشي داورانيركن بير قيسمي خالقا ظولوم ائتمكده‌دير . باخ بئله بير زاماندا مؤوسوم باهار اولدوغو اوچون خالق پئنجر توپلاماغا چيخير. بير عاييله‌دن قادين گلين و قيزكنده چوره‌سينده پئنجر توپلاماق اوچون گئده‌رلر . پئنجر توپلايا ، توپلايا كنددن اوزاق لاشارلار . بيردن شام آغاچلارينين آراسيندان اوچ ، بئش قاچاق قول‌دور اورتايا چيخير ، بونو گؤرن قادين لار اولجه چاشيب قاليرلار . آمما قاچاق قول دورلارين اوستلرينه گلديكلريني گؤردوكلرينده نيت لرينين پيس اولدوغونو باشا دوشورلر . ايندي‌يه قدر بير ائركه‌يه چئويريليب باخمادان آج سوسوز ياشاماغي ، ناموس‌سوز ياشاماقدان اوستون بيلن قادين لارين جانينا قوْرخو دوشور . وار گؤچلري ايله كنده قاچماغاباشلاييرلار . آمما قولدورلار گئديكجه اونلارا ياخلاشماقداديرلار . آرتيق قولدورلارين اليندن قاچماغين مومكون اولماديغيني باشا دوشن قادينلارآللا‌ها سيغيناراق دوعا ائديرلر : يا رب يا بيزلري قوش ائيله اوچوب جانيميزي قورتاراق ، يادا بيزي داش ائيله بو آرخاميزا دوشن ناموس دوشمن لريندن خيلاص اولاق ، دئييرلر .
اوجاآللاه، دارداقالميش بو اوچ قادينين دوعالاريني ائشيدير و اونلاري داشا چئويرير.
حاديثه‌نين اولدوغو اوچ قيزلار دئيلن بو بولگه‌‌ده ، ياشيلليق‌لار ايچينده اوچ قايا پارچاسي بولونماق‌دادير. بو قايالاردان بيري اوْلدوكچا ايري و گئنيش‌تير . بير باشقاسي ايسه اونا گؤره‌داها دار ، اوچونجوسو ايسه ديگر ايكي سينه گؤره داها كيچيكدير . بو قايالارين ان بويوك اوْلانينين ائوين خانيمي ديگرينين گليني ، ان كيچيينين ايسه ائوين قيزي اولدوغو سؤيلنمك ده‌دير . بو افسانوي بوتون چئوره خالقي بيلمك ده‌دير و سؤيله‌نيلن افسانه‌نين بير تاريخي ثوبوتو اولاراق گؤستريلن بو قايالاري افسانه‌وي ائشيدن انسان‌لار گليب گؤرمه‌يه جان آتماقدادير . آلديغيميز بيلگيلره گؤره بونا بزر افسانه‌لر » گلين قاياسي « » قيرخ قيز:« و ..... آذربايجان‌دا دا گئنيش ياييلميشدير . بو فاكتين اؤزو آيري آيري جوغرافي مكان لاردا ياشاسالاردا تورك لرين عيني طالعي ياشاديغيني گؤسترمك ده‌دير . چونكي افسانه‌لر هر شئي‌دن اؤنجه جمعيتين خاطيره دئپوسو قان يادداشيدير.
نتيجه :
قادين‌لار نه‌اولورسا اولسون ناموس لاريني قورومالي و بو يولدا هر شئي گؤزه آلمالي دير . پئنجر توپلايان قادينلارناموس لاريني قوْروماق اوچون سوْن نفس لرينه قدر قاچيرلار آمما خيلاص اولابيلمه‌يه‌جكلريني آنلايينجا داش اولماق ايسته‌ييرلر . قادين لارين زورلانماسي آغير بير وضعيت دير . بو يولدا هر كسين دويارلي اولماسي لازيمدير.
پئنجر توپلاييب اوشاق‌لاريني دوْيوزدورماقدان باشقا بير مقصدي اولمايان قادين‌لاري بئله بير موداخيله‌يه له اؤزلشمه لري يووالارين داغيلماسينا سبب اولموشتور .
اوره‌ك‌دن ائديلن دوعالار قبول اولونور ، تانري طرفيندن قادين لارين دوعالاري قبول ائديلير و قادين لار داشا دؤنورلر . تانري پيس وضعيته دوشن قول لارينين خيلاص‌كاري‌دير. قادين‌لار چاره‌سيز قالينجا تانري‌يا سيغينيز و نيجاتي داش اولماقدا گؤرورلر ، آمما بو يول لا دا ناموس لاريني قورتاريرلار بو اونلار اوچون بير نيجات يول دور . آداملار آراسيندا ايش بؤلگوسو آپاريلاركن قادين لارين وضعيتي نظره آلينماليدير . پنجر توپلاماق قادين لارين ايشي دير . آمما چؤلده يالنيز دولاشماق اونلارين باشلارينا ايش آچميشدير .
بير چئوره ده قولدورلوق وارسا اونون قارشيسي كيمسه‌يه ضرر وئريلمه‌دن آلينماليديرپئنجر توپلايان قادين لارين قاچاقلار طرفيندن قورخودولموش دور . بو افسانه‌نين بير نئچه بنزه‌رينن آزربايجان فولكلوروندا تاپماق مومكون دور .
* بو مطلب باكي‌دا چيخان فولكلور و ائتنوگرافييا ژورناليندان كؤچورولموشدور
بؤلوم :
+0 به يه ن
