اهر هاراي
ايران تورك فيلتر شد.
آنا یارپاق              ایلگی              ایمیل              RSS              ATOM
بلاقا گؤره



سون یازی لار
+0 به يه ن

آذربايجان ديلي، آناديليم

 حسن ايلديريم



آذربايجان ديلي،آناديليم
حسن ايلديريم

(مقاله اختصارلانيبدير)

ديل اجتماعي بير وارليق‌دير. انسانلار، ديل واسطه‌سي ايله بير ـ بيرلريني آنلايـير، باشا دوشور. بو باخيمدان  ديل، اونسيت واسطه‌سي، تفكّور قاليبي، هم ده دونياني درك ائتمه آلتي‌دير. باشقا بير سؤزله دئسك، انسانلار ديل واسطه‌سي ايله دوشونور، فيكير‌لريني تجسّوم ائدير و باشقالاري ايله  اونسيت‌ده اولور. دئمك، ديل انسان حياتي‌نـين، انسان جمعيتي‌نين هم معناسي هم ده او وارليغين انعكاسيدير.
ديل، جمعيتين ماليدير. جمعيت يوخدورسا، ديل ده يوخدور. انسان جمعيتي ايله ديل بيرگه يارانيب، بيرگه انكشاف ائديب و بوگونگو وضعيته چاتيبدير. انسانلارين حيات طرزي، دونيا گؤروشلري يالنـيز ديل واسطه‌سي ايله آيدين‌لاشا بيلر. دوز دئـييرلر كي، ديل جامعه‌نين گوزگوسودور. ديل ائله بير ميثيل‌سيز اجتماعي حادثه‌دير كي، انسان جمعيتي‌نين الده اولونموش علمي – مدني تجربه‌لريني محافظه ائده‌ر‌ك، اونلاري ياشاتديرير، انكشاف ائتديرير. ديل واسطه‌سي ايله‌دير كي، كئچميش نسيل‌لرين بيليك و تجربه‌لريني اينديكي نسيل منيمسه‌ييب، اؤيره‌نير و گله‌جك نسيل‌لره چاتديرا بيليرلر. بئله‌ليكله اجدادلارلا تؤره‌مه‌لر آراسيندا معنوي كؤرپو يارانير.
ديلين كمكي ايله انسانلار علم، تكنيك و باشقا مدني ثروت‌لري الده ائده بيليرلر. ديلين وارليغي ايله، مدنيت‌لر يارانير. ديلين واسطه‌سي ايله مدنيت‌لر بوتون بشريتين مالينا چئوريلير. يئر كوره‌سي‌نين مليت‌لري، مدنيت‌لري، ديل واسطه‌سي ايله بير ـ بيرلري ايله علاقه ساخلايا بيلرلر. علمي كشف‌لر، بديعي صنعت اثرلري، فلسفي، اخلاقي نظريه‌لر و…ديل واسطه‌سي ايله دونيادا ياييلير. بئله حال‌لاردا  زامان و مكان‌لا علاقه‌دار اولاراق ديلين يازيلي شكليندن داها گئنيش استفاده اولونور. جمعيتين علمي -  مدني حياتينين انكشافيندا ديل قده‌ر  باشليجا رول اوينايان باشقا بير اجتماعي وارليق يوخدور.
هر بير خالقين  ديلي اونون، ملي اؤزونه مخصوص‌لوغونون تجسّومودور. او خالقين بوتون مدني كئچميشيني محافظه ائدن ان مهم واسطه، ديل‌دير. پروفسور آغاموسا آخوندوون فيكيرينجه : « ديل بير چوخ اجتماعي حادثه لردن فرق‌لنير. ديل هئچ بير حالدا عموم بشري اولماييب؛ ديل ملي سجيه داشيييب. ديل بير اونسييت واسطه‌سي، فيكيرين ايفاده واسطه‌سي كيمي مختلف خالق‌لارين، ملت‌لرين ديلي كيمي موجوددور. هر ديلين اؤزونون سجيه‌وي خصوصيت‌لري وار .»
يئر اوزونده، چوخ ملت‌لر، خالق‌لار، قووم‌لار ياشايـير. اونلارين اؤز يوردو، مدنيتي، عادت – عنعنه‌سي اولدوغو كيمي، اؤز ديللري ده واردير. هر خالقين دوغما ديلي اونون « آناديلي » ساييلير. آنا ديلي، او ديلدير كي، انسانلار اونونلا ديل آچير، اونونلا دانيشير، اونونلا ياشايير، اونونلا اؤلورلر. بيزيم ده آناديليميز، آذربايجان ديليدير. آناميزين بطنينده آناميزين قاني ايله، دويغولاري ايله بيرگه دامارلاريميزدا دولاشيب. اونون سئوگي و محبّتي‌نين ايشيغيندا، بيزيم جانيميزدا كؤك ساليب و دوغولاركن دوداق‌لاريميزدا چيچك‌لنيب، لايلالارلا،  نازلامالارلا، بوي آتيب و عؤمروموز اوزونو بئينيميزين، اوره‌ييميزين، ايش‌لريميزين، آرزو و ايستك‌لريميزين ترجماني اولوب. دئمك بئشيك باشيندان – قبير داشيناجان دويغو و دوشونجه‌لريميزين بوتون چالارلاريني قلبيميزين ان درين قات‌لاريندا گيزلنن احتراص‌لاريميزي، هيجان و اضطراب‌لاريميزي تجسّوم و ايفاده ائدير. آغي لارلا، اوخشامالار بيزي سون منزيله تاپشيرير.
آكادئميك ميرزه ابراهيم اوو يازير: « هر خالقين آنا ديلي، اونون ملي وارليغينين، معنوي عالمي‌نين ايفاده‌سي‌دير. بئله‌ليك‌له هر ديل بير خالقين، ملتين وارليغيني بيلديرن، قورويان ان مهم عاميل‌لردن بيري‌دير .  »
هر بير خالقين، ملتين آنجاق بير آنا ديلي واردير. همين ديل، او خالقين و ملتين عمومي ديلي اولدوغو اوچون، او ديله عموم خالق ديلي دئييرلر. مثال اوچون بيزيم آناديليميز، عموم خالق ديليميز آذربايجان ديلي‌دير. بو ديل، آذربايجان خالقينين معنوي واري، و كيملييي‌دير. عموم خالق ديلي ايكي مهم قولا آيريلير: دانيشيق ديلي و ادبي ديل. ادبي ديل عموم خالق ديلي‌نين ان يوكسك فورماسيدير. داها دوغروسو ادبي معيارلارين، اوسلوب‌لارين واسطه‌سي ايله فيكيرين دقيق، آيدين، سرراست و آنلاشيلان شكيلده ايفاده اولماسينا امكان يارادير.
ادبي ديل، عموم خالق ديلينده، سئچمه، عوض ائتمه، آلينما، ايتيرمه، معيارلاشما عمليات‌لاري نتيجه‌سينده اوسلوب‌لار سيستمينه دوشور. بو عمليات‌لار اجتماعي ـ مدني دييشيك‌لرله سيخ باغليدير. آنجاق هر بير اوسلوب، ديلين ملي خصوصيت‌لري اساسيندا قورولور، تكميل‌لشير. آذربايجان ديلي  انكشاف ائتميش ديللر سيراسيندادير. اونون دا يوكسك كئيفيته ماليك اولان ادبي ديلي واردير.
دونيا خالق‌لاري ادبي ديللر واسطه‌سي ايله بير ـ بيرلري ايله ادبي، مدني، اجتماعي علاقه ساخلايير و فيكير مبادله‌سينه گيريشيرلر. بو مبادله‌لرده عاليم‌لر، يازيچيلار، مطبوعات ايشچي‌لري و معلم‌لرين و … بؤيوك رولو اولور. بو ساحه‌ده هئچ كيم خالق ديلي ايله يازيچي و شاعرلر قده‌ر باغلي اولمور. چونكي بديعي سؤز صنعتي‌نين اساسي سؤز اوسته قورولور. سؤز اونلارين هم ايفاده آلتي، هم‌ ده اثرلري‌نين جوهري، ماياسيدير. اونلار سؤزه سويوق قانلي مناسبت بسله‌يه بيلميرلر. سؤز شاعر ـ يازيچي اوچون  ديري و جانلي بير وارليق‌دير. اونلار اوچون سؤز چوخ معنالي، چوخ يؤنلودور. اونلار سؤزو بيلير، دويور، لمس ائدير، سؤزون رنگيني، عطريني، چكي‌سيني سئزه بيليرلر و سؤز ياراديجيليغيندا بو قابليت‌دن اولدوقجا يئرلي- يئرينده فايدالانماغي باجارا بيليرلر. پروفسور توفيق حاجي‌يئو چوخ گؤزه‌ل دئيير: «او (سؤز اوستاسي)، سؤز ماتئرياليني يونور، جيلالايير، صنعت فاكتينا چئويرير. اونو اوسلوبي داورانيش اوچون چئويك‌لشديرير، حساس‌لاشديرير.
يازيچي ـ شاعر بو استقامتينده ياراديجيليق فعاليتي‌ني  موافق بديعي ـ اوسلوبي ايشله برابر ان چوخ ادبي ديلين خئيرينه يؤنلير… ».
دونيانين بويوك يازيچيسي ماكسيم گوركي‌نين ايفاده‌سي ايله دئسك: «ادبياتين اساس ماتئريالي سؤزدور. بيزيم  بوتون تأثيرات‌لاريميزي، دويغولاريميزي، فيكيرلريميزي فورمايا سالان سؤزدور».
دئمه‌لي: «يازيچينين ان عالي مقصدي سؤزله حياتا كئچير، بديعي اثرين ان يوكسك مطلبي، علوي فيكيرلري سؤزله ايفاده اولونور. »
يازيچيلار، شاعرلر و هر هانسي بير فيكير آدامي، قلم صاحبي يوخاريداكي كيفييت‌لري ييه‌لنمك اوچون اؤز نطق مدنيتي‌ني انكشاف ائتديرمه‌لي‌دير. بونون اوچون، او ديلي دريندن، هر طرفلي اؤيرنمه‌لي و سؤزون سيرلر خزينه‌سينه يول تاپماليدير. چونكي ديلين داخلي قانونلاريني، اونون سؤز قورولوشو، سؤز بيرلشمه‌لري و جمله  قورولوش‌لارينين سجيه‌لريني اؤيرنيب، منيمسه‌مه‌دن، او ديلين گؤزه‌ل‌لي‌يينه، ايفاده‌لي‌لي‌ينه ييه‌لنمك امكان‌سيز‌دير. هر كيم بو كيفيت‌لري اؤيرنير و اونلاري منيمسه‌ييرسه، او آدام يوكسك نطق مدنيتينه صاحب اولا بيلير.
هر ملتين، خالقين مدني گؤستريجي‌لريندن بيري ده  شفاهي – يازيلي نطق سانيلير. نطق مدنيتي ديلين امكان‌لاريندان معاصر سويه‌ده استفاده ائتمك باجاريغي دئمك‌دير. ديلين گؤزه‌ل‌لي‌ييني ايفاده‌لي‌لي‌يني اوز دانيشيق ياخود يازيسيندا آيدين، آچيق، آخيجي، موسيقي‌لي شكيلده عكس ائتديره بيلن هر بير كيمسه يوكسك نطق مدنيتينه يييه‌لنميش آدام اولور.
بوگون نطق مدنيتينه صاحب اولماق مدني‌ليك معيارلاريندان بيري‌دير. يوكسك مدني نطق، معاصر ادبي ديلين انكشاف ائتميش، معيارلاري ايله سس‌لشن اوسلوبلاري سيستمينده بوللورلاشان نطق دئمك‌دير.
حؤرمتلي عاليم، پروفسور يحيا كريم‌وو يازير: «كفايت قده‌ر سؤز احتياطينا مالك اولان، اونون معناسيني بيلن، سؤزدن يئرلي ـ يئرينده، دقيق معنادا استفاده ائتمه‌يي باجاران آدامين نطقي آيدين، جاذبه‌لي؛ سؤزو چوخ چئويك اولماقلا سئحيرلي بير عالم يارادير. ديلين ديگر واحدلري آنجاق سؤزون وارليغي شرايطينده يارانير ».
هرهانسي بير ديلي اؤيرنديكده، ايلك نووبه‌ده اونون سؤزلريني، جمله‌لريني، داها دوغروسو لغت تركيبني و ديل قورولوشو قايدالاريني اؤيرنيريك. بو قايدالار ايسه او ديلين اؤزونه مخصوص‌دور. ديلين وارليغيني تأمين ائدن اساس قووه ايسه ائله بو قايدا – قانون‌لاردان عبارت‌دير.
گراماتيكا( ديل قورولوشو قايدالاري) هر شئي‌دن اول، بو و يا ديگر بير ديلين صرف و نحويني، يعني سؤزلرين سس‌لردن يارانماسيني، دييشمه‌سيني، بيرلشمه‌سيني، قانونا اويغون شكيلده موجود اولماسيني و فعالييت گؤسترمه‌سيني عكس ائتديرير. بو معنادا گراماتيكا تمامي ايله سجيه‌وي خصوصيت داشيير. يعني او ديلين اؤزونه مخصوص مكانيزميني عكس ائتديرير. ديلچي‌لييه گيريش كتابيندا اوخويوروق: «انسان فيكيرلرينين مادي ديل شكلينه دوشمه‌سي اوچون لغت تركيبينده سؤزلرين معيين قايدا ـ قانونلار اوزره ديلين، «گراماتيك» قورولوشو ايله اوزلاشماسي واجب‌دير. بونلار اصلينده سؤزلرين دييشمه‌سي، بيرلشمه‌سي  واسطه‌سي ايله عمله گلير، ائله بو معنادا ديلين لغت تركيبي ايله  اونون «گراماتيك» قورولوشو قارشيليق‌لي علاقه‌ده اولور. محض بونا گوره ده ديل سيستيمينده هر بير ديلين بير شئي و «گراماتيك» قورولوشون ايسه باشقا شئي اولدوغونو دوشونمك البتّه سهودير. «گراماتيك» قورولوش انسان فيكيرلري‌نين ماددي ديل جيلدينه دوشمه‌سينه، انسانلار آراسيندا اونسييتين عمله گلمه‌سينه كومك ائدير. ».
هر بير ديل، دانيشيق ديل سويه‌سيندن ادبي ديل سويه‌سينه يوكسلديكجه، او ديلده يازيب-يارادان و اوخويانلاردا، او ديلين قايدا ـ قانونلاريني اؤيرنمه‌سينه جان آتير. بو ايش‌ده، يعني ديلين اؤيرنيلمه و اؤيرديلمه‌سينده ديلچي عاليم‌لرين كومه‌يي  بويوك اولور. اونلار ادبي ديلين قايدا ـ قانون‌لاريني، آرايير ـ آراشديرير. اونون سيستيميني، قايداسيني، نظاملايير و علمي اساس‌لار اوزره تنظيم ائدير و بو يول‌لا ديل‌لرين عمومي قانونو، هابئله عموم خالق ديللري‌نين، ديل قورولوشو قايدالاري سيستيملي صورتده يازيلير.
ادبي ديليميزين ايشلنمه دايره‌سي گئنيش‌لنديكجه، اونون اؤيرنيلمه و اؤيرديلمه موضوعسودا آنا ديلينده يازان يازيچيلاريميزي داها جدي شكيلده دوشونمه‌يه يؤنلتميشدير. بو اوزدن ديليميزين قورولوشو و صرف و نحوي‌نين چئشيدلي واحدلري ساحه‌سينده آراشديرمالار آرتميش و بير چوخ مقاله و كتاب يازيلميش‌دير. بو اثرلرين داشيديغي هدف‌لر باشقا ـ باشقا  اولدوغو كيمي اونلارين مندرجه‌لري و علمي سويه‌لري ده مختلف‌دير. مؤلف‌لري‌نين علمي بيليييندن، مقصديندن آسيلي اولاراق اونلارين متودلاري و آراشديرما يول‌لاري و هدف‌لري ده آيري ـ آيري سجيه‌لر داشيييرلار. بو يازيلارين بعضي‌لري علمي نطقه‌يي نظردن دايازدير. بعضي‌لري ايسه باشقا ديللرين ( عرب، فارس،…) قايدا- قانون‌لاري اساسيندا ديليميزي اؤيرنمه‌يه جان آتميشلار. بو يانليش آدديم‌لارا باخماياراق بير نئچه ديلچي عاليم طرفيندن ديليميزين قورولوش قايدالاري، او تايين آكادئميك اثرلريندن قايناقلاناراق آكادئميك سويه‌ده يازيلميشدير. بو عاليم‌لرين اثرلري چوخ اؤنملي اولسا دا، آنجاق هله ده ايران آذربايجانيندا، آنا ديليميزين قورولوش قايدالاريني، علمي اساس‌لار اوزره، ساده شكيلده ايضاح ائدن، معاصر اؤيرديجيليك متودلارين  يولو ايله ساده، ييغجام بير ديلله اوخوجو كوتله‌لرينه آنلادان، اونلارين  ايستك‌لريني، احتياج‌لاريني جدي صورتده اؤده‌مك مقصدي ايله يازيلان، عادي اوخوجودان دوتموش تا تجربه‌لي قلم صاحب‌لري‌نين يارارلاناجاغي بير اثرين يئري بوش ايدي. بو بوشلوغون دولدورولماسي آناديليميز ساحه‌سينده چاليشانلارين قارشيسيندا دوران ان اؤنملي وظيفه‌لردن بيري ايدي.
بو گون آرتيق اناديليميزين ديرچليش واختي‌دير. ادبي ديليميزين يوكسليشي ايله ادبي ـ بديعي اوسلوبلارين ايشلنمه قوه‌سي‌نين آرتماسي و احاطه دايره سي نين گئنيشلنمه سي ايله، چئشيدلي يازي نوع‌لري‌نين‌ده چوخالماسي طبيعي سسلنير. بونا اعتبارن ديليميزين علمي ـ ايشلك رولونو هر طرفلي اؤيرنمك مسئله سي اؤنملي بير موضوعويا چئويريلميش دير .
بوگون ياشلي قلم صاحب‌لريميز سيراسينا، گنج و استعدادلي يازيچي و شاعر لرده قوشلوموشدور. بو سيرا  گوندن -  گونه سيخلاشير و گوجلنير. سون واختلار، ديليميزده اونلارجا رومان، حكايه لر مجموعه سي، ادبي  ـ تنقيدي يازيلار، علمي ـ تدقيقي اثرلر ياييلميشدير. اجتماعي، تاريخي، مدني ساحه لرين باشقاـ باشقا موضوعلاريندا چوخ بيتگين و ديرلي اثرلر يازيلمشدير. فولكولور نمونه‌لري ايله  برابركلاسيك ادبي متن‌لر، ديوان‌لاردا گئنيش اوخوجو كوتله‌سي‌نين اختيارينا قويولموشدور. بو گون آناديللي مطبوعاتميز دا ماراقلي بير دورومو ياشاماقدادير: اونلارجا اؤيرنجي درگي‌لري، بير نئچه فصلنامه، آيليق، هفته‌ليك ديليميزده نشر اولونور . مطبوعات ديليميزين دايره سي و نفوذو  گونو ـ گوندن  آرتير و گوجلنير.  ادبي ديليميزين ايشلنمه ميداني دا گئنيش‌لنير. ايندي ادبي انجمن‌لرين، محفل‌لرين جلسه لرينده، اينترنت سايتلاريندا، وبلاق لاردا، تئاتر سالونلاريندا، تلويزيون كانال لاريندا ديليميزين ايشلنمه وضعيتي جدي بير حال آليبدير. تأسف‌لر اولسون كي بئله بير واختدا هله ده مكتب لرده آنا ديليميز تدريس  اولونمور، هله‌دير كي يوزلرله ضيالي و علم آداملاري‌نين « آنا ديلي ميزين » اؤيرنيلمه‌سي بارده ايستكلري جاوابلانماييبدير! بئله بير حالدا ادبي ديليميزين اؤيرنيمله‌سي يازيچيلاريميزين قارشيسيندا دوران ان بؤيوك و جدي مسئله لرين بيري دير. چونكي، بو ديرچليش و يوكسليش آنلارنيدا ادبي ديليميزين گوجونون، زنگينليي نين ،الوان ليغي و گؤزل ليني نين  باش قالديرديغي بير واختدا، ديليميزده  يازيب ـ ياردان قوه لر ديليميزين افاده ليك قابليتينه ييه‌لنمك اوچون اونون لغت تركيبيني، قورولوشونو، دريندن  اؤيرنمه لي اولورلار. بئله حالدا اصيل ادبي ـ علمي متن لرله تانيش اولمادان، ايستر- ايستمز يانليش مئيل لره توتولوب و باشفا تورك منشالي ديللره اوز توتمالي اولورلار. او ديللرين سؤزلري، سؤز بيرلشمه لري .سؤز ياراتما قايدالاري جمله قورما يول‌لاري ( شعورلو وشوعورسوز اولاراق )  بيزيم ديلده او يازيچي لارين اثرلري سيماسيندا اؤزونو گؤسترير.
يئني ـ يئني ادبي قوه‌لرين، قلم صاحبلري‌نين فعاليتي‌نين گرگينلشدييي و معاصر ادبي ديليميزده  يازيب – اوخوما ماراغي‌نين آرتديغي بير واختدا، ادبي ديليميزه باشقا ديللردن سؤز و ايفاده آخيمي‌نين‌دا گوجلنمه‌سينه‌ده شاهد اولوروق. بو حادثه، قلم صاحبلري‌نين ادبي ديليميزله لازيمينجا تانيش اولمامالاري، چئشيدلي  ادبي – بديعي متن لرين الده اولماماسي و شخصي ماراق لار بئله بير آخينا يول آچير. البته بو آخينمانين باشقا بير سببي ده شعورلو صورتده آنا ديليميزي، هانسي‌سا بير ديلين لهجه‌سي، ياخود قالينتيسي كيمي قلمه وئرنلرايسه ديليميزي پوزقونلاشديران بو آخيني، گوجلنديرمه‌يه چاليشيرلار. يئني ادبي قوه لر بيلمه‌دن، ادبي ديليميزله تانيش اولمادان،  توركيه توركجه  سينه اوز توتورلار. آنجاق بير پارا ديرناق آراسي عاليم‌لر بيله ـ بيله، شعورلو اولاراق ديليميزه ياماق اولان، اونو پوزغون حالا سالان  سؤز و افاده لرله دولدورماغا چاليشيرلار.  حتي توركيه ديلي نين صرف و نحويني ديليميزده اجرا ائتمك‌له هانسي‌سا اويدورما تورك ديلي ياراتماغا جان آتيرلار .اونلار، ديليميزين عادي و دوغما سؤزلريني، سؤز ييرلشمه‌لريني و علمي ـ ادبي اصطلاح لاريني توركيه توركجه سينده كي قارشيليق لاري ايله عوض ائديرلر . تورك ديلي نين  سؤز قورولوشو و جمله  قورولوشو قايدالاريني ديليميزه سوخماقلا ديليميزين گراماتيك قانونلاريني پوزارق اونو توركيه ديلي نين قويروغو، يا  ان آزي بير لهجه‌سي كيمي گؤسترمك ايسته ييرلر. البته ديليميز بئله ياد تأثيرلرين نتيجه‌سينده پوزقونلاشما  تهلكه‌سي ايله قارشيلاشسادا امينيك كي سارسيلماياجاق يئنه ده گونو ـ گوندن  چيچكلنيب، زنگين‌لشيب  داهادا جيلالانيب و دونيانين ان مدني ديللري سيراسيندا  اولدوغو كيمي انكشاف ائده‌جك‌دير.
ادبي ديليميزده خلل گتيرن، كوبودلوقلارين و عيبجرليك‌لرين باشقا  بير تظاهروده فارس و عرب سؤزلري‌نين، يئرسيز ايشليديلمه سي دير: ديليميزده فارس وعرب ديللري نين صرف ونحوي اساسيندا سؤزبيرلشمه لري و عباره لر دوزلديرلروديليميزين دوغما قايدا ـ قانون لاريني پوزاراق قوندارما و قوراما بير ديل قوراشديرير لار كي  آديني « دوه قوشو » ديلي  قويماق اولار. چونكي بو يارامازلارين ديلينه نه فارس ديلي، نه عرب ديلي، نه ده كي آذربايجان ديلي دئمك اولار . بئله بير ديل له  اوخوجولار اؤزو  ياخشي تانيش‌ديرلار. بو حادثه ايسه پهلوي شوونيست‌لري نين قالينتي‌لارينين تؤر- تؤكونتو‌لري‌ايله باغلي دير.
بو خسته‌ليك‌لرين ان اساس سببلريندن بيري ديليميزين مكتبلرده تدريس اولونماماسي و ادبي ديليميزده متن‌لرين ياييلماماسي اولسادا، منجه بو حادثه اوزون ايللر اؤزونو، پهلوي شوونيست‌لري نين آنا ديليميزين بوغازنيا جايناغيني ايليشديريب، اونو بوغوب، يوخ  ائتمك ايسته ديكلريندن آسيلي دير .
ادبي ديليميزين انكشافينا مانع اولان ايرينتي‌لردن بيري ده ادبي ديليميزده افراط شكيلده  يئرليچي ليك مئيلي نين آرتماسي‌دير، آذربايجان ادبي ديلي‌ايله ياخشي تانيش اولمايان، اونون كلاسيك و معاصر متن لريني اوخومايان ،يالنيز شفاهي ادبي ديل ايله محدود صورتده تانيش اولان بعضي قلم صاحبلري، ياشاديق لاري بؤلگله‌لرين، كندلرين يئرلي سؤزلريني يازيلاريندا يئرلي ـ يئرسيز ايشلتمه‌لري دير. اونلاردا ادبي ديليميزين دوغما و ايشليك سؤزلريني بيلمه دن  يئرلي سؤزلرله ديشييرلر. بو ديشمه لر بعضان ائله  گولونج اولور كي، سؤز اويونوندان باشقا هئچ بير شئيه اوخشامير. آنجاق بو يول‌لا اونلار، ادبي ديليميزين پوزغونلوغونا يول وئريرلر. بئله حال‌لار ديلي باياغيلاشديرير. حتي اونو پارچالانما، بؤلونمه تهلوكه سينه گتيريب چيخاردا بيلر. بئله عيبجرليك‌لر بو گون ادبي ديليميزين قارشيسيندا دوران ان جدي مانعه لردن دير…….
منيم فيكيريمجه بو گون معاصر آذربايجان ادبي ديلي‌نين اؤيرنيمله‌سي بؤيوك اؤنم داشيير. آنا ديلين علمي و مئتدوديك صورتده اؤيرديلمه‌سي، ديليميزين دوغرو و دوزگون انكشافينا خدمت ائدير. ديليميزين قانونا اويقونلاري، قايدالاري علمي يول‌لا درين و اطرافلي شكيلده بوتون اينجه‌ليك‌لري ايله اؤيرنيليرسه، ادبي ديليميزين، شفاهي نطقميزين افاده قابليتي آرتير، ديليميزين ايشلنمه دايره‌سي گئنيشلير. اوخوجو كوتله‌سي‌نين شفاهي و يازيلي نطق مدنيتي يوكسلير. اونلار باجاريقلا، ثمره لي شكيلده ديلين افاده امكانلاريندان، سؤز خزينه سيندن يارارلانيرلار. نطق‌لري روانلاشير، جلب ائديجي و تأثيرلي اولور . بونلارا ادبي ديليميزين، بديعي ادبياتيميزين بؤيوك اوغورلار قازاناجاغينا  امكان يارادير….


بؤلوم :
یکشنبه 26 شهریور 1391


بؤلوم لر
     
باغلانتی لار
یارپاق لار
سایغاج
  • ایندی بلاق دا :
  • بوتون گؤروش لر :
  • بو گونون گؤروشو :
  • دونه نین گؤروشو :
  • بو آیین گؤروشو :
  • باخیش لار :
  • یازی لار :
  • یئنیله مه چاغی :

جنبش مبارزه با سياست هاي ضد تركي ويكي پديا

ایران تورک : فرهنگ و تاریخ تورکان جهان